सुजल श्रेष्ठ
प्यूठान । राष्ट्रसेवक कर्मचारीहरुको सहकारीको रुपमा चिनिएको राष्ट्रसेवक बहुउदेश्यीय सहकारी संस्था प्यूठानले आफ्ना शेयर सदस्यलाई पौने ५ करोड ऋण लगानी गरेको छ । सदरमुकाम खलंगामा अवस्थित सहकारीले ४ करोड ७४ लाख ११ हजार १३ रुपियाँ ऋण लगानी गरेको हो ।
सहकारीको आज १७ औं वार्षिक साधारणसभामा कोषाध्यक्ष तुल बहादुर गुरुङले आर्थिक प्रतिवेदन प्रस्तुत गर्दै ३ सय ९० जना शेयर सदस्य रहेको सहकारीको कुल सम्पत्ती ५ करोड ६७ लाख ३३ हजार ८६३ रुपियाँ रहेको जानकारी दिनुभयो ।
साधारणसभामा सचिव पिताम्बर भण्डारीले प्रगति प्रतिवेदन प्रस्तुत गदै सहकारीका सदस्यहरुको बचत सहज बनाउन बैंकिक एप सञ्चालन गर्ने प्रस्ताव गर्नुभएको छ । कर्मचारी सरुवा हुने क्रम चलिरहँदा शेयर सदस्य थपघट भइरहने समेत उहाँले उल्लेख गर्नुभयो । जिल्लाका ९ वटै स्थानीय तहमा कार्यरत कर्मचारीलाई समेत सदस्य बनाउन पहल गरि स्थानीय तह स्तरमा सम्पर्क कार्याय खोल्ने योजना रहेको सुनाउनुभयो ।
कार्यक्रममा विभिन्न सहकारी संस्थाका प्रमुख तथा प्रतिनिधि, विभिन्न संघ संघ संस्थाका प्रतिनिधिले शुभकामना मन्तव्य दिँदै सहकारीहरु बचत र ऋण परिचालनमा मात्र केन्द्रित नभएर उत्पादन मूलक क्षेत्रमा लगानी गरेर रोजगारी सृजनातर्फ लाग्नुपर्ने बताएका थिए ।
शेयर सदस्यलाई पुरकार र सम्मान
साधारण सभाको अवसरमा विभिन्न क्षेत्रमा उत्कृष्ट शेयर सदस्यलाई पुरस्कार तथा सम्मान गरिएको छ । असल बचतकर्ता लक्ष्मण प्रसाद श्रेष्ठ, असल ऋणी गिरीराज शर्मा, जेष्ठ शेयर सदस्य हरिहर लवट, बढी शेयर खरिद कविराज शर्मा र शैक्षिक पुरस्कार शेयर सदस्य टुक बहादुर रोका र राधिका खड्काको छोरा दिक्षित रोकालाई प्रदान गरिएको छ ।
जिल्ला समन्वय समितिको सभाहलमा भएको कार्यक्रममा सहकारीका अध्यक्ष गोपाल प्रसाद नकर्मीको अध्यक्षता तथा जिल्ला समन्वय समिति प्यूठानका प्रमुख धरम बहादुर जिसीको प्रमुख आतिथ्यता रहेको थियो ।
