> विचार > होम क्वारेनटाईनमा बस्न लिखित सम्झौता गरेका छौं


होम क्वारेनटाईनमा बस्न लिखित सम्झौता गरेका छौं

विष्णु कुमार गिरी
अध्यक्ष
गौमुखी गाउँपालिका, प्यूठान
मिल्दोजुल्दो लक्षण देखिए उपचारका लागि पठाउने हो तर लक्षण नदेखिएकाले पनि यसको संक्रमण फैलाउन सक्ने भएकाले तत्काल चेकअप पर्ने प्राविधिक समस्या हामीसँग छ ।

१) सरकारले लक डाउनलाई थप कडाई गरको छ ? त्यसका लागि गौमुखी सरकारले कसरी काम गर्दैछ ?
कोरोना भाईरस संक्रमणको शुरुदेखि नै सचेतनामा जोड दिएका छौं । सरकारले लक डाउन घोषणा गरेपश्चात स्थानीय स्तरमा यस बारेमा सचेतनाको काम गरिरहेका छौं । कटुवाल मार्फत हाक लगाउने, महिला स्वास्थ्य स्वयमसेविका, जनप्रतिनिधि, कर्मचारीहरु परिचालन गरि सबैलाई जानकारी गराउने गरेका छौं ।
अहिले खेतिवाली भित्र्याउने समय भएकाले सावधानि अपनाएर पारिवारिक रुपमा काममा जान भनेका छौं । ठूलो समुह नबनाउन सुझाव दिने गरेका छौं ।

२) लक डाउनकै कारण समस्यामा परेका ज्यालादारी श्रमिक, असहायको पहिचान र राहत वितरण के कसरी हुँदैछ ?
४८५ ज्यालादारी श्रमिक तथा असहायहरुलाई राहत वितरण गरेका छौं । असहाय बालबालिका, एकल महिला, बृद्धबृद्धा, आफ्नो उत्पादनले एक महिनापनि खान नपुग्नेहरुको पहिचान गरि लगत संकलन गरि खाद्यान्न सामाग्री वितरण गरेका हौं । ५ जना सदस्यसम्मको परिवारलाई १० केजि चामल, १ केजि चिनी, १ केजि नुन, १ लिटर तेल, १ केजि दाल र २ वटा साबुन वितरण गरेका छौं भने ५ जना सदस्यभन्दा माथिको परिवारलाई अन्य सामाग्री सहित १५ केजि चामल वितरण गरेका छौं ।

३) क्वारेन्टाइनको अवस्था के हो ? बाहिरबाट आएका कति हुन ? कति बसेका छन् ? किन बस्न मानेनन ?
हाम्रोमा पालिकाले स्थापना गरेको ५ वटा वेडको क्वारेन्टाईन सालिविसौनामा छ । त्यस्तै वडा कार्यालय खुङले ४ र लिवाङले २ वेडको क्वारेन्टाईन निर्माण गरेका छन् । गौमुखी गाउँपालिकामा ९६ जना भारत तथा तेश्रो मुलुकबाट आएका छन् । कोहि पनि पालिकाले स्थापना गरेको क्वारेन्टाईमा छैनन् । सबै होम क्वारेन्टाईनमा बसेका छन् । उनीहरु सामाजिक बहिष्करणको त्रासमा छन् । संभावित संक्रमणको जोखिमलाई ध्यान दिँदै स्थानीयहरु उनीहरुको नजिक नजाने भएकाले यस्तो त्रासले गर्दा क्वारेन्टाईनमा बस्न मान्दैनन् ।
हामीले भारत तथा तेश्रो मुलुकबाट आएकाहरुसँग सम्झौता गरेका छौं । स्वास्थ्य मन्त्रालयले पठाएको फम्र्याटमा परिवारका सदस्यसँग समेत टाढा हुने गरी होम क्वारेन्टाईनमा बस्न सम्झौता गरेका हौं । उनीहरुसँग स्वास्थ्यकर्मीले नियमित भेटघाट गर्ने र स्वास्थ्य अवस्था बारे जानकारी लिने गर्नुभएको छ । हामीसँग दुई वटा ‘गन थर्ममिटर’, ५० सेट प्लाष्टिक र कपडाको स्थानीय स्तरमै निर्माण गरेको व्यक्तिगत सुरक्षा सामाग्री (पिपिई), १० सेट विश्व स्वास्थ्य संगठनको मापदण्ड अनुसारको पिपिई र स्वास्थ्य कार्यालय मार्फत प्राप्त ३ सेट पिपिई छन् । यिनै सुरक्षा सामाग्रीको प्रयोग गरि स्वास्थ्य अवस्थाबारे जानकारी लिने, विरामी भएकालाई औषधी उपचार गर्ने गरेका छौं । जोखिमपूर्ण केसहरु अहिले छैनन् ।

४) अहिलेको महामारीमा जनताले स्थानीय सरकारको अनुभुती गर्न पाए त ? कसरी ।
संकटको यस समयमा गौमखुीबासीहरुलाई जे समस्या पर्छ गाउँपालिकालाई खबर गर्नुहुन्छ र समाधानका लागि समन्वय गर्ने गरेका छौं, यसले के पुष्टि गर्छ भने गाउँसरकार जनताको साथमा छ । स्वास्थ्य उपचार, राहत, काम गर्न बाहिर निस्कनु प¥यो, अत्यावश्यक कामले आवतजावत गर्नुप¥यो जस्ता समस्याहरु आउने गरेका छन् । समस्यामा परेकाहरुको समस्या समाधान हुँदा उहाँहरुले स्थानीय सरकारको महसुस गर्नुभएको छ ।

५) यो महामारी नियन्त्रणका लागि स्थानीय सरकारलाई के सहयोग आवश्यक छ ?
कसलाई कोरोनाको संक्रमण छ भन्ने थाहा छैन । मिल्दोजुल्दो लक्षण देखिए उपचारका लागि पठाउने हो तर लक्षण नदेखिएकाले पनि यसको संक्रमण फैलाउन सक्ने भएकाले तत्काल चेकअप पर्ने प्राविधिक समस्या हामीसँग छ । छिटो चेकजाँच गर्न पाएमा सबैजना ढुक्क हुन सक्ने थियौं ।

नमुना सम्झौता फारम


प्रस्तुती : सागर रिजाल

Leave a Reply

Your email address will not be published. Required fields are marked *