महेश थापा
बाहाने । नौबहिनी गाउँपालिका वडा नम्वर ७ को विभिन्न बस्तीमा पहिरोले घरगोठ बगाएको छ । वडाको पातचौर, सुरदिप, गोगनपानी, मैरामारे, गोमिजामा गएराती पहिरोले घरगोठ बगाएको हो ।
वडा अध्यक्ष रेगम प्रसाद बुढाथोकीका अनुसार पातचौर बस्तीमा अमृत रोकाको घर पहिरोले बगाएको छ । त्यसैगरी सुरदिप बस्तीमा कुमार बुढाथोकीको घर बगाएको छ भने यसमान खड्काको गोठ भत्किएको छ । कविराम बुढाथोकीको घर उच्च जोखिम परेको छ । पहिरोले गोगनपानीमा हिरा बहादुर पुन विटालुको थारो बगाएको छ । मैरामारेमा फुलंगा रानाको भैंसी सहित गोठ बगाएको वडा अध्यक्ष बुढाथोकीले जानकारी दिनुभयो ।
गोमिजामा रुकमान खड्काको गोठ बगाउँदा ४ वटा बाख्रा मरेका छन् । गोमिजामै प्रेम बहादुर खड्को घर उच्च जोखिम परेको छ । विभिन्न बस्तीमा पहिरोले क्षति भएपछि तथ्यांक लिन टोल टोलमा पुगेको वडाअध्यक्ष बुढाथोकीले जानकारी दिनुभयो । पहिरोले विद्युत, सडक समेत अवरुद्ध भएको छ ।
