प्यूठान । प्रेस चौतारी नेपालको २५ औं स्थापना दिवस जिल्लामा विविध कार्यक्रम गरि मनाइएको छ ।
प्रेस चौतारी नेपाल जिल्ला शाखा प्यूठानले दिवसको अवसरमा आज जिल्ला अस्पतालका विरामीलाई फलफुल वितरण, रक्तदान कार्यक्रम र सम्मान कार्यक्रम गरेको हो ।
विजुवारमा भएको कार्यक्रममा लुम्बिनी प्रदेशसभा सदस्य तुल्सीराम शर्माले चौतारीका पत्रकारलाई क्रियाशिल हुँदै निरन्तर कलम चलाउन आग्रह गर्नुभयो । उहाँले संगठनलाई संस्थागत बनाउँदै अगाडी बढ्न शुभकामना दिनुभयो ।
पुरस्कार र सम्मान
दिवसको अवसरमा शाखाका पूर्व अध्यक्ष एलबी थापालाई स्व. गोपालदास नकर्मी स्मृति पत्रकारिता पुरस्कार प्रदान गरिएको छ ।
त्यसैगरी निवर्तमान अध्यक्ष एवं मल्लरानी गाउँपालिका-३ का वडा अध्यक्ष नोमराज पौडेललाई सम्मान गरिएको छ ।
जिल्ला अध्यक्ष बासुदेव गिरीको अध्यक्षतामा भएको कार्यक्रममा चौतारीका केन्द्रीय सदस्य गिरुप्रसाद भण्डारीको विशेष आतिथ्यता रहेको थियो । कार्यक्रमको सञ्चालन सचिव राम बहादुर विश्वकर्माले गर्नुभएको थियो ।
