प्यूठान । जिल्लामा पहिरोबाट विस्थापित भएका परिवारले राहत पाउन थालेका छन् । वर्षातका कारण सडक अवरुद्ध हुँदा तत्काल राहत पाउन नसकेका परिवारले राहत पाउन थालेका हुन् ।
हिजो विहीबार प्यूठान उद्योग वाणिज्य संघ, निर्माण व्यवसायी महासंघ प्यूठान र लायन्स क्लव अफ प्यूठानले माण्डवी गाउँपालिका-२ धनचौरका विस्थापितलाई राहत उपलब्ध गराएको छ । 
मर्कावाङको सुन्नानी आधार मावि रातापानीसम्म राहत पुर्याएको निर्माण व्यवसायी संघ प्यूठानका अध्यक्ष नविन कुमार श्रेष्ठले जानकारी दिनुभयो । विस्थापित परिवारले आज उक्त राहत बुझेका छन् ।
आज शुक्रबार रेडक्रस प्यूठानले माण्डवी गाउँपालिका १, २ र ४ का विस्थापित ५९ परिवारलाई खाद्यान्न बाहेकका सामाग्री वितरण गरेको छ । त्यसैगरी ऐरावती गाउँपालिका-४ तिग्रापातालका २६ परिवारलाई राहत सामाग्री वितरण गरिएको रेडक्रस प्यूठानले जनाएको छ ।
गौमुखीले ऐरावती र माण्डवीलाई सहयोग गर्ने
प्यूठान । गौमुखी गाउँपालिकाले माण्डवी र ऐरावती गाउँपालिकामा भएको विपदको घटनाप्रति दुःख व्यक्त गर्दै राहत र पुर्नस्थापनाका लागि सहयोग गर्ने जनाएको छ । 
दुवै गाउँपालिकालाई १/१ लाख रुपिया सहयोग गर्ने निणर्य भएको अध्यक्ष विष्णु गिरीले जानकारी दिनुभयो ।
