प्यूठानमा १२ हजार हेक्टर क्षेत्रफलमा आगलागी, संलग्न ६ जना पक्राउ

प्यूठान । जिल्लामा दिनहुँ आगलागीका घटनाहरु भैरहेका छन् । हालसम्म १५.७८ प्रतिशत जंगलमा आगलागी भएको छ ।

७६ हजार हेक्टर जंगल क्षेत्र मध्य करिव १२ हजार हेक्टरमा आगलागी भएको जिल्ला वन कार्यालय प्यूठानका अधिकृत हरि पौडेलले जानकारी दिनुभयो । आगलागी घटनामा संलग्न ६ जनालाई पक्राउ गरिएको उहाँले जानकारी दिनुभयो । ४ जना विरुद्ध मुद्धा दर्ता भैरहेको र दुई जनालाई थुनामा राखि अनुसन्धान भैरहेको छ ।

चैत्र र बैशाख महिनामा गरि १२८ वटा आगलागीका घटना भएको जिल्ला प्रहरी प्रमुख प्रहरी नायव उपरिक्षक इश्वर थापाले जानकारी दिनुभयो । आगलागीका घटनाबाट ५३ घर, ९ गोठ, १०८ ठाँऊ वनमा, अन्य १२ ठाँऊमा आगलागी भएको छ । आगलागीबाट ११२ चौपायाको मृत्यु, २१ घाईते र ५७४ घरपालुवा पंक्षीको मृत्यु भएको उहाँले जानकारी दिनुभयो ।