प्यूठान । नेपाल कम्युनिष्ट पार्टी (एमाले) का महासचिव शंकर पोख्रेलले देशमा ६० वर्षसम्म अधिकारको राजनीति चलेको भन्दै अव समृद्धिका लागि विकासको राजनीति गर्नुपर्ने बताउनुभयो । उहाँले अहिले पाँच दलीय गठबन्धनले व्यक्तिगत र सत्ता स्वार्थका लागि काम गरेको टिप्पणी गर्नुभयो ।
“केन्द्रमा केपी ओलीले र प्रदेशमा हामीले विकासको काम अघि बढाएका थियौं,” माण्डवी गाउँपालिकाको प्रशासकीय भवन उद्घाटन कार्यक्रममा उहाँले भन्नुभयो, “गठबन्धनलाई विकास मन परेन ।” उहाँले जनताले विकास विरोधी राजनीतिक दललाई कसरी निर्वाचनमा जिताउलान ? भन्दै प्रश्न गर्नुभयो ।
माण्डवी गाउँपालिकाले उत्कृष्ट कार्य गरेको भन्दै उहाँले आगामी निर्वाचनमा विकास गर्ने जनप्रतिनिधिलाई सहयोग गर्नुपर्ने बताउनुभयो । उहाँले जुनसुकै दलको भएपनि विकासका विषयमा सहकार्य गरेर नमुना पालिका बनाउनुपर्नेमा जोड दिनुभयो ।
“संविधानले दोश्रो कार्यकालका लागि स्थानीय तहमा उम्मेदवार हुन पाउने व्यवस्था गरेको छ, उहाँले भन्नुभयो, “राम्रो काम गर्नेहरुलाई जनताले पुन: अनुमोदित गर्ने विश्वास लिएको छु ।”
