प्यूठान, १६ भदौ । शुक्रबार पहिरोले घर पुरिदा घाईते भएकी बालिकाको उपचारको क्रममा मृत्यु भएको छ ।
प्यूठान नगरपालिका वडा नम्वर ४ ठुटेसिमल निवासी कुल बहादुर थापाको ११ महिनाको छोरीको उपचारको क्रममा मृत्यु भएको हो ।
घरमाथीबाट ठूलो ढुंगा सहित खसेको पहिरोले घर पुरिदा बालिका घाईते भएकी थिइन । उनलाई उपचारका लागि बुटवल लगिएको थियो । टाउकोको शल्यक्रिया गरेपनि सफल हुन नसकेको र सोमबार मृत्यु भएको स्थानीय एकराज भण्डारीले जानकारी दिनुभयो ।
पहिरो पीडित परिवार घर भत्किएपछि दाजुको घरमा बस्दै आएका छन् । बच्चालाई सुताएर काममा गएको बेला पहिरो गएको थियो ।
