प्युठान। अत्यधिक वर्षाका कारण जिल्लाको माण्डवी गाउँपालिका–४ फरिण्डेमा पहिरोले घर पुरिदा ६ जना बेपत्ता भएका छन् । स्थानीय बोम बहादर राहुँमगरको घर सहित चार घर पहिरोले पुरिएको वडा अध्यक्ष डिल बहादुर घर्तिले बताउनुभयो ।
बेपत्ता हुनेहरुमा ६० वर्षीय बोम बहादुर राहुँ, उहाँको श्रीमती(नाम खुल्न बाँकी), २१ वर्षीय टेकी राहुँमगर, ४ वषीय सुशान राहुँ, ६० वर्षीया हिरा बहादुर थापा र १८ वर्षीया मौषमी थापामगर रहेको स्थानीय यादप पौडेलले जानकारी दिनुभयो ।
पहिरोले घर पुरिएको खवर प्राप्त भएपछि घटना स्थलमा जिल्लाबाट प्रहरीको टोलि गएको प्रहरी निरीक्षक सुशील थापा मगरले जानकारी दिनुभयो । प्रहरीका अनुसार माण्डवी १ स्थित अरङ खोलाले बगाउँदा ३५ वर्षीय धन बहादुर सुनार बेपत्ता भएका छन् । यसअघि दशैको दिन ऐरावती–५ जाडीखोलाले बगाएका ५ वर्षीय सुसन सुनार फेला परेका छैनन ।
