> खेलकुद > लुम्बिनी र एपीएफको बिजयी शुरुआत


लुम्बिनी र एपीएफको बिजयी शुरुआत

दाङको लमहीमा शनिबारदेखि प्रधानमन्त्री कप महिला क्रिकेट प्रतियोगिता सुरु भएको छ । लमहीमा रहेको अन्तर्राष्ट्रिय क्रिकेट मैदानमा प्रतियोगिता सञ्चालन भएको हो ।

 

पहिलो खेलबाट नै लुम्बिनी प्रदेश र विभागीय टोली एपीएफले विजयी सुरुवात गरेका छन् । लुम्बिनीले पहिलो खेलमा प्रदेश नम्बर २ लाई ९ विकेटले हराउँदै उत्कृष्ट सुरुवात गरेको हो ।

पहिलो ब्याटिङ गरेको प्रदेश नम्बर २ ले पुरै ओभर खेलेर ७७ रन जोडेको थियो । ७८ रनको विजयी लक्ष्य पछ्याएको लुम्बिनीले १६ दशमलव १ ओभरमा १ विकेट गुमाउँदै लक्ष्य पूरा गरेको हो । लुम्बिनीकी गीता गोसाई ४२ बलमा २ चौकासहित २३ रनमा अविजित रहिन् । कप्तान नेरी थापा १३ बलमा २ चौकासहित १५ रनमा अविजित रहिन् ।

पहिलो विकेटका लागि गीता गोसाई र सरस्वती घर्ती मगरले १२ ओभरमा ५३ रनको साझेदारी गरेका थिए । सरस्वतीलाई कविता गौतमले २२ रनमा आउट गर्दै पहिलो सफलता दिलाएकी थिइन् । उनले ४२ बलमा १ चौका प्रहार गरिन् । प्रदेश–२ की बलर कविता गौतमले १ विकेट लिइन् ।

त्यसअघि लमहीको देउखुरी क्रिकेट मैदानमा टस हारेर ब्याटिङ थालेको प्रदेश नम्बर २ ले निर्धारित २० ओभरमा ७ विकेट गुमाउँदै ७७ रन बनाएको थियो । प्रदेश २ का लागि ओपनर सना प्रविन र अनु चौधरीले सर्वाधिक २१–२१ रनको योगदान दिए ।

लुम्बिनीकी सुस्मिता भुषालले ४ ओभरमा १० रन खर्चेर ३ विकेट लिइन् । स्वस्तिका बजागाईंले ४ ओभरमा १७ रन खर्चेर १ विकेट लिइन् ।

दोस्रो खेल लुम्बिनीले आइतबार कर्णाली प्रदेशविरुद्ध खेल्नेछ । आइतबार प्रदेश नम्बर २ ले एपीएफसँग खेल्नेछ ।

शनिबार भएको दोस्रो खेल भने एपीएफले जितेको छ । सशस्त्र प्रहरीको एपीएफ क्लबले कर्णाली प्रदेशलाई २ सय ४ रनले पराजित गरेको हो । एपीएफले दिएको २ सय ३६ रनको विशाल लक्ष्य पछ्याएको कर्णालीले १४ ओभर १ बलमा अलआउट हुँदै जम्मा ३१ रनमात्रै जोडेको थियो ।

कर्णालीका लागि कुनै पनि खेलाडीले दोहोरो अंकमा रन बनाउन सकेनन् । एपीएफकी करुणा भण्डारी एक्लैले ५ विकेट लिइन् भने राजमती भण्डारीले २, सोनु खड्का र रेखा रावलले १–१ विकेट लिए ।

पहिले ब्याटिङ गरेको एपीएफले २० ओभरमा ४ विकेट गुमाएर २ सय ३५ रन बनाएको थियो । उसका लागि सीता रानामगरले सर्वाधिक ६८ रन बनाइन् भने सरिता मगरले ४४, ज्योति पाण्डेले ३२ र इन्दु बर्माले २२ रन बनाए ।

Leave a Reply

Your email address will not be published. Required fields are marked *